s'Lied vom Aescher Wy

Wo Birs und Chlusbach Hochzyt hei noh mänggem wilde Rangg,
do wo mer eusi Räbe hei, by Pfäffige und Angestei,
lyt Aesch bigott blitz-blangg, lyt Aesch bigott blitz-blangg.
Das Dörfli wachst eim gschwind ans Härz und wenn ein cheert dört y,
vergisst är alle Ärdeschmärz und d'Seel zieht's himmelwärts.
Bym Tschöppeler und bim Chluserwy weimer luschtig sy,
bym Tschöppeler und bim Chluserwy weimer luschtig sy,

Am Bärg wo eusi Räbe sy, do wachst au eusre Stolz,
dört wachst dr gueti Aescherwy, die Trübel, wo so goldig sy
am Aescher Räbeholz, am Aescher Räbeholz.
Dä Räbbärg wachst eim gschwind ans Härz, wie chönnt's au anderscht sy
der Räbgeischt tilgt der Ärdeschmärz und d'Seel zieht's himmelwärts.
Bym Tschöppeler und bim Chluserwy weimer luschtig sy,
bym Tschöppeler und bim Chluserwy weimer luschtig sy,

Und so wie euse Räbesaft sin d'Aescher Maitli au,
der Räbgeischt, wenn är trybt und schafft, är git de Trübel Chraft und Saft
und eusre Maitli au und eusre Maitli au.
Sone Maitli wachst eim gschwind ans Härz, isch's ächt nur wägem Wy?
's vertrybt dir alle Ärdeschmärz und d'Seel zieht's himmelwärts.
Vom Tschöppeler und vom Chluserwy, Proscht und schängget y,
vom Tschöppeler und vom Chluserwy, Proscht und schängget y!

Aus dem Festspiel "Hüscht und hott dur Aesch bigott"
Kantonales Gesangfest 1937
Musik: Edmund Stroh
Text Rudolf Mäglin